శ్రీమద్భగవద్గీత - ఎనిమిదవ అధ్యాయము

             ॥ఓం శ్రీపరమాత్మనే నమః॥

ఎనిమిదవ అధ్యాయము - అక్షరబ్రహ్మయోగము

                     అర్జున ఉవాచ 

కిం తద్బ్రహ్మ కిమధ్యాత్మం కిం కర్మ పురుషోత్తమ।

అధిభూతం చ కిం ప్రోక్తమ్ అధిదైవం కిముచ్యతే॥1॥

అధియజ్ఞః కథం కో౭త్ర దేహే౭స్మిన్ మధుసూదన।

ప్రయాణకాలే చ కథం జ్ఞేయో౭సి నియతాత్మభిః॥2॥

                  శ్రీభగవాన్ ఉవాచ

అక్షరం బ్రహ్మ పరమం స్వభావో౭ధ్యాత్మయముచ్యతే।

భూతభావోద్భవకరో విసర్గః కర్మసంజ్ఞితః॥3॥ 

అధిభూతం క్షరో భావః పురుషశ్చాధిదైవతమ్।

అధియజ్ఞో౭హమేవాత్ర దేహే దేహభృతాం వర॥4॥

అంతకాలే చ మామేవ స్మరన్ ముక్త్వా కలేవరమ్।

యః ప్రయాతి స మద్భావం యాతి నాస్త్యత్ర సంశయః॥5॥

యం యం వాపి స్మరన్ భావం త్యజత్యంతే కలేవరమ్।

తం తమేవైతి కౌంతేయ సదా తద్భావభావితః॥6॥

తస్మాత్ సర్వేషు కాలేషు మామనుస్మర యుధ్య చ।

మయ్యర్పితమనోబుద్ధిః మామేవైష్యస్యసంశయమ్॥7॥

అభ్యాసయోగయుక్తేన చేతసా నాన్యగామినా।

పరమం పురుషం దివ్యం యాతి పార్థానుచింతయన్॥8॥

కవిం పురాణమనుశాసితారమ్ అణోరణీయాంసమనుస్మరేద్యః।

సర్వస్య ధాతారమచింత్యరూపమ్ ఆదిత్యవర్ణం తమసః పరస్తాత్॥9॥

ప్రయాణకాలే మనసాచలేన భక్త్వా యుక్తో యోగబలేన చైవ।

భ్రువోర్మధ్యే ప్రాణమావేశ్య సమ్యక్ స తం పరం పురుషము పైతి దివ్యమ్॥10॥

యదక్షరం వేదవిదో వదంతి విశంతి యద్యతయో వీతరాగాః।

యదిచ్ఛంతో బ్రహ్మచర్యం చరంతి తత్తే పదం సంగ్రహేణ ప్రవక్ష్యే॥11॥

సర్వద్వారాణి సంయమ్య మనో హృది నిరుధ్య చ।

మూర్ధ్న్యాధాయాత్మనః ప్రాణమ్ ఆస్థితో యోగధారణామ్॥12॥

ఓమిత్యేకాక్షరం బ్రహ్మ వ్యాహరన్ మామనుస్మరన్।

యః ప్రయాతి త్యజన్ దేహం స యాతి పరమాం గతిమ్॥13॥

అనన్యచేతాః సతతం యో మాం స్మరతి నిత్యశః।

తస్యాహం సులభః పార్థ నిత్యయుక్తస్య యోగినః॥14॥

మాముపేత్య పునర్జన్మ దుఃఖాలయమశాశ్వతమ్।

నాప్నువంతి మహాత్మానః సంసిద్ధిం పరమాం గతాః॥15॥

ఆబ్రహ్మభువనాల్లోకాః పునరావర్తినో౭ర్జున।

మాముపేత్య తు కౌంతేయ పునర్జన్మ న విద్యతే॥16॥

సహస్రయుగపర్యంతమ్ అహర్యద్ర్బహ్మణో విదుః।

రాత్రిం యుగసహస్రాంతాం తే౭హోరాత్రవిదో జనాః॥17॥

అవ్యక్తాద్వ్యక్తయః సర్వాః ప్రభవంత్యహరాగమే।

రాత్య్రాగమే ప్రలీయంతే తత్రైవావ్యక్తసంజ్ఞకే॥18॥

భూతగ్రామః స ఏవాయం భూత్వా భూత్వా ప్రలీయతే।

రాత్య్రాగమే౭వశః పార్థ ప్రభవత్యహరాగమే॥19॥

పరస్తస్మాత్తు భావో౭న్యో౭వ్యక్తో౭వ్యక్తాత్ సనాతనః।

యః స సర్వేషు భూతేషు నశ్యత్సు న వినశ్యతి॥20॥

అవ్యక్తో౭క్షర ఇత్యుక్తః తమాహుః పరమాం గతిమ్।

యం ప్రాప్య న నివర్తంతే తద్ధామ పరమం మమ॥21॥

పురుషః స పరః పార్థ భక్త్వా లభ్యస్త్వనన్యయా।

యస్యాంతఃస్థాని భూతాని యేన సర్వమిదం తతమ్॥22॥

యత్ర కాలే త్వనావృత్తిమ్ ఆవృత్తిం చైవ యోగినః।

ప్రయాతా యాంతి తం కాలం వక్ష్యామి భరతర్షభ॥23॥

అగ్నిర్జ్యోతిరహః శుక్లః షణ్మాసా ఉత్తరాయణమ్।

తత్ర ప్రయాతా గచ్ఛంతి బ్రహ్మ బ్రహ్మవిదో జనాః॥24॥

ధూమో రాత్రిస్తథా కృష్ణః షణ్మాసా దక్షిణాయనమ్।

తత్ర చాంద్రమసం జ్యోతిః యోగీ ప్రాప్య నివర్తతే॥25॥

శుక్లకృష్ణే గతీ హ్యేతే జగతః శాశ్వతే మతే।

ఏకయా యాత్యనావృత్తిమ్ అన్యయావర్తతే పునః॥26॥

నైతే సృతీ పార్థ జానన్ యోగీ ముహ్యతి కశ్చన।

తస్మాత్ సర్వేషు కాలేషు యోగయుక్తో భవార్జున॥27॥

వేదేషు యజ్ఞేషు తపస్సు చైవ దానేషు యత్పుణ్యఫలం ప్రదిష్టమ్।

అత్యేతి తత్సర్వమిదం విదిత్వా యోగీ పరం స్థానము పైతి చాద్యమ్॥28॥

ఓం తత్సదితి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే

శ్రీకృష్ణార్జునసంవాదే అక్షరబ్రహ్మయోగో నామ అష్టమో౭ధ్యాయః॥౮॥